البطاطس والطين لتفتيح البشرة والإيدين

مغلي البطاطس.. لوسيون لنضارة وتفتيح الإيدين
اللوسيون ده بيدّي نضارة وتفتيح ونعومة للإيدين..

المكونات:
مية البطاطس
عصير ليمونة
3 ملاعق جليسرين
1/ 2 ملعقة زيت لوز حلو


الطريقة:
مية البطاطس بتحضّريها بإنك تغسلي البطاطس كويس أوي، وتقطّعيها أو تبشريها بقشرها وتسلقيها في مية، وبعد كده تاخدي المية دي، وتخلطيها مع باقي المكونات.

اللوسيون ده تحتفظي به في زجاجة وتخلّيه في الثلاجة، وتستعمليه كل يوم قبل النوم؛ لأن زي ما إحنا عارفين إن أي ماسك داخل فيه ليمون لازم نستعمله بالليل قبل النوم، ونبعد عن الصبح علشان ممكن يسمر البشرة.

البطاطس والعسل.. لبشرة رايقة من الشوائب
الماسك ده من الحاجات المفيدة جدا للبشرة، واللي بيروّقها بشكل ملحوظ؛ لأنه بيمتص كل الشوائب من البشرة.


المكونات:
3 شرائح بطاطس مسلوقة بقشرها ومهروسة
ملعقة عسل


الطريقة:
اخلطي العسل مع البطاطس كويس أوي، بس لازم البطاطس تكون سخنة، وحطّي الماسك على بشرتك وهو دافي على أد ما تقدري؛ لأن ده بيفيد البشرة، وبيخلّيها كأنها مغسولة، والماسك ده بيروّق البشرة وبيدّيها نص درجة تفتيح، وكمان بيشد البشرة، وبيخلي فيها نعومة وحيوية.

القرفة وبياض البيض.. لبشرة مشدودة ونضرة
الماسك ده من الحاجات اللي بتدّي لمعة ونضارة للبشرة، وكمان بيشدّ ويفرد الجلد بشكل ملحوظ..

المكونات:
ملعقة بياض بيض
1/ 4 ملعقة قرفة


الطريقة:
اخلطي بياض البيض مع القرفة، وبعد كده وزّعي الماسك على بشرتك بعد ما تغسليها كويس، وسيبيه على البشرة لمدة نص ساعة، وبعدين اشطفيه، وامسحي بشرتك قطنة فيها مية ورد.



ماسكات لتفتيح البشرة:

ماسك اللوز والبيض:
المكونات:
ملعقة لوز مطحون
ملعقة بياض بيض
عصير 1/ 2 ليمونة


الطريقة:
اخلطي المكوّنات مع بعضها، وافردي الماسك على بشرتك، وسيبيه لمدة نص ساعة وبعدين اشطفيه.

والمداومة على الماسك ده كل يوم لمدة أسبوع هيساعد على تفتيح البشرة أوي، وبعد ما تشطفي الماسك ده ادهني بشرتك بدهان خفيف من زيت اللوز الحلو قبل النوم، وإن شاء الله هتلاقي نتيجة هايلة.


ماسك الأرز واللبن:
المكونات:
2 ملعقة أرز مطحون
ملعقة لبن بودرة أو لبن حليب
1/ 2 ملعقة جلسرين


الطريقة:
اخلطي المكوّنات مع بعضها كويس؛ بحيث إن العجينة تبقى مرملة، وبعد كده افردي الماسك على بشرتك، وسيبيه لمدة نص ساعة، وبعدين اشطفيه، وممكن تمسحي بشرتك بقطنة مبلولة بماء الورد.





شمع العسل.. لترطيب الشفايف
المكونات:
قطعة شمع العسل
3 ملاعق صغيرة زيت لوز حلو


الطريقة:
اخلطي المكوّنات دي مع بعضها، وقلّبيهم كويس جدا مع بعض، وبعد كده احتفظي به في علبة زجاج في الثلاجة، واستعملي منه كل يوم.

وزي ما قلنا قبل كده إننا بنغسل وشنا كل يوم بالليفة المصرية، وكمان ممكن تفركي بيها شفايفك، وتشيلي منها القشور، ولما تحطّي عليها أي مرطب هتبقى ملساء وهتعمل النتيجة اللي إنتي عايزاها.






صابون الطين:
المكونات:
3 فنجان مية ورد مخففة بسيط
صابونة مبشورة
3 قطع طين طبيعي
ملعقة كبيرة زيت لوز أو زيتون
ملعقة عسل معاها شمع العسل
3 ملاعق متوسطة لبن بودرة


الطريقة:
ذوّبي الطين في شوية مية صغيرين، وبعدين حطّيه في حلة ومعاه فنجان مية ورد، وقلّبيهم على النار كويس لحد ما الطين يدوب تماما.

بعد كده حطّي الصابون المبشور، وقلّبي كويس أوي طول ما الخليط على النار، وبعدين ضيفي فنجان مية ورد، وقلّبي الخليط كويس علشان يدوب، وبعدين ضيفي فنجان تاني من مية الورد.

بعد كده ضيفي اللبن وقلّبي كويس، وبعدين حطّي زيت اللوز، وآخر حاجة هتحطيها هي العسل مع شمع العسل، وده هيساعد أكثر في ذوبان الخليط، ودايما أي ماسك بيكون داخله عسل نحل بنحطّه آخر حاجة علشان العسل ما يفقدش قيمته بالتسخين.

بعد ما الخليط يدوب كويس ابدئي صبّيه في قوالب، ويفضّل إنها تكون من الزجاج أو الخشب، وبلاش بلاستيك أو معدن نهائي.

سيبي الصابون ينشف تماما في مكان بارد بعيد عن الشمس، وبعدين تستخدميه.

شاركي اصحابك

Posted in: العناية باليدين, ماسكات لتفتيح البشرة, وصفات لنعومة البشرة