بلسم للشعر وماسكات بالأوكسجين لتفتيح البشرة

بلسم للشعر
المكونات:
1/ 8 كيلو شمع البلسم
1/ 8 كيلو مية بلسم

الحاجات دي هتلاقيها إمّا عند العطار، أو عند محلات مخصصة لبيع المواد الكيميائية والصابون، والحاجات دي رخيصة جدا، وهتلاقيها بسهولة.

الطريقة:
اغلي كوب ميه، وبعد كده حطّي فيه ملعقة شمع البلسم مع التقليب المستمر، وبعد ما يذوب تماما ضيفي ملعقة مية بلسم، وهي بتبقى ميه لزجة شوية، وأوّل ما تحطّيها تهدّي النار وتقلّبيها، وأهم حاجة إن التقليب يبقى في اتجاه واحد لمدة 4:3 دقائق، ومع التقليب هتلاحظي إن الميه لونها هيبيض وهتتقل شوية.

بعد كده ارفعيه من على النار، وسيبيه لحد ما يبرد، وقلّبيه كويس، وبعد كده ابتدي عبّيه في برطمانات زجاج، واستعملي منه.




ماسك الفراولة
الماسك ده بيدّي نضارة وحيوية للبشرة المجهدة ممكن تعمليه على بشرتك بعد إجهاد الشغل، أو لو فيها أي إرهاق هيدّيها حيوية ونضارة بشكل حلو.

مكوّنات الماسك:
ملعقة كبيرة عصير فراولة
ملعقة صغيرة عسل
ملعقة بياض بيض


الطريقة:
هتاخدي عصير الفراولة، وتحطّي عليه بياض البيض وملعقة صغيرة عسل نحل، وتقلّبي الخليط كويس أوي، وبعد كده تحطّي الماسك ده على بشرة مغسولة كويس، وتسيبيه نصف ساعة، وبعد كده تغسلي وشك بالميه، وممكن تحتفظي بالماسك ده في الثلاجة لمدة يوم واحد.




ماسك اللافندر لِحَب الشباب
الماسك ده بمثابة سنفرة للبشرة، ومهدئ للحبوب، وممكن تحطّيه فوق وتحت العين.

المكونات:
3 ملاعق صغيرة عشب اللافندر
ملعقة صغيرة زيت زيتون


الطريقة:

اخلطي المكوّنات كويس، وحطّيها على بشرة مغسولة، وافركي بشرتك كويس بيه في حركات دائرية من تحت لفوق، وسيبيه على البشرة لمدة نصف ساعة، وبعدين اشطفيه.


ماسك البصل للبُقَع والنمش
الماسك ده بيدّي نتيجة هايلة مع المداومة عليه مرة الصبح ومرة بالليل، بس أهم حاجة إنك ماتعرّضيش وشك للشمس أو الضوء، وكمان من الفوايد المهمة جدا للبصل إنه بيأخّر ظهور التجاعيد.

طريقة تحضير الماسك
هتجيبي البصل وتبشريه ناعم أوي وتصفّيه في شاشة، أو تعصريه في الخلاط، ولكن يُفضّل إنك تعصريه في عصارة الجزر أو بالمبشرة، ومهم جدا إنك تستخدمي عصير البصل في نفس الوقت اللي هتحضّريه فيه؛ لأنه بيحتوي على زيوت طيّارة لازم البشرة تستفيد منها.

للبشرة الدهنية أوي: هتخلطي ملعقة عصير بصل ونصف ملعقة خل تفاح.
للبشرة العادية أو المركبة: هتخلطي ملعقة عصير بصل مع نصف ملعقة عسل.

وبتسيبي الماسك على البشرة من 20:15 دقيقة فقط، وبعدين تشطفيه، وتدهني وشك بزيت اللوز الحلو، بس أهم حاجة إنك ماتقربيش الماسك من منطقة العيون.


ماسك تفتيح للبشرة الدهنية بمية الأوكسجين
الماسك ده بيعمل تفوير للبشرة من الحبوب الصغيرة والدهون الزائدة اللي بتعمل بهتان، وبيشيل الاتساخات من البشرة، وكمان بيساعد على تفتيح البشرة وترويقها.

الماسك ده للبشرة الدهنية فقط، وما ينفعش إنك تستخدميه لو بشرتك عادية أو جافة أو حسّاسة.

مكونات الماسك:
عصير ليمونة
ملعقة بياض بيض
10 نقط مية أوكسجين بنسبة تركيز 10%

الطريقة:
قلّبي الليمون مع الأوكسجين كويس أوي، وحطّي عليهم بياض البيض، وحطّي الماسك على بشرة تكون مغسولة بس بطريقة عادية من غير ليفة أو ميه سخنة باستخدام قطنة وسيبيه على البشرة من غير ما تفركيها لمدة 10:5 دقائق، وأهم حاجة إنك تبعدي عن منطقة العيون، وكمان تبعديه عن شعر الحواجب؛ لأنه ممكن يفتّحها، وبعدين تشطفيه بمية ساقعة، وممكن تكرري الماسك ده كل 15 يوم.






ماسك تفتيح للبشرة العادية والمركبة
مكونات الماسك:
عصير ليمونة
5 نقط مية أوكسجين بتركيز 10%
3 ملاعق لبن
3 ملاعق صغيرة دقيق


الطريقة:
اخلطي المكونات، وقلّبيها كويس لحد ما تعمل عجينة ناعمة، وحطّيه على بشرة مغسولة زي ما قلنا من غير ليفة أو مية سخنة، وسيبيه على البشرة لمدة 20 دقيقة.

أهم حاجة إن الماسكات اللي بتحتوي على مية أوكسجين تستعمل فورا؛ لأنك ماينفعش تخزّنيها.

شاركي اصحابك

Posted in: العناية بالشعر, ماسكات لتفتيح البشرة