قرفة وتوم وكاموميل لشعر طويل.. واللانولين لبشرة حرير ~ ماسكاتنا : ماسكات طبيعية للبشرة و الشعر و الجسم للنساء فقط

النهارده هنعمل فيها ماسكات لتساقط الشعر وإزاي نطوّل شعرنا...

وكمان هنعمل ماسك باللانولين لبشرة زي الحرير وصابون الأناناس، تابعونا...

ماسك الثوم لتساقط الشعر
المكونات:
3 فصوص ثوم بلدي
ملعقة زيت سمسم
ملعقة زيت زيتون
ملعقة زيت خروع
ملعقة زيت لوز

الطريقة:
هناخد الثوم ونعصره في عصارة الجزر أو نبشره علشان ناخد منه كمية من العصير، وبعد كده نحط عليه الزيوت الأربعة اللي قولنا عليهم، وممكن لو عايزين تضيفوا زيوت تانية مافيش مانع بس الزيوت دي كافية أوي.

هنسيب الثوم في الزيوت دي لمدة ثلاثة أيام، وبعد كده نصفّي الزيت لو الثوم مبشور، ونحط الزيت على جذور الشعر فقط وطبعا يكون مغسول ونسيبه لمدة ساعة ونصف وبعدين نغسله تاني.

لو عايزين نعمل كمية أكتر يبقى هناخد راس توم كاملة وعليها 5 ملاعق من كل نوع زيت ونسيبها 3 أيام قبل ما نبدأ نستخدمها، وممكن نحتفظ بالكمية دي في زجاجة في الثلاجة لمدة شهر.

لو عايزين نضيع ريحة التوم يبقى ممكن نشطف شعرنا بمغلي المريمية أو زهرة الكاموميل، بس الأهم من ده إننا لازم بعد ما نغسل شعرنا من الماسك مانلموش ونسيبه علشان يتهوّى والريحة تروح منه ونعمل له حمام كريم أو بلسم ونعمل له سيشوار ده هيساعد إن الريحة تطير منه.

ماسك القرفة لتطويل الشعر
من المعروف طبعا إن القرفة وزيت القرفة من الحاجات اللي بتطوّل الشعر بس لازم ناخد بالنا ونلتزم بالمدة المسموح بها علشان نسيب القرفة على شعرنا لأن لو المدة زادت ممكن يجيب نتيجة عكسية...

المكونات:
عيدان قرفة صغيرة أو 3 ملاعق متوسطة قرفة مطحونة
سبرتو أبيض

الطريقة:
هنحط عيدان القرفة أو المطحون ونحط عليهم كمية مناسبة من السبرتو تغطي كمية القرفة، ونسيب القرفة منقوعة في السبرتو ومتغطية لمدة 15 يوم بره التلاجة.

بعد 15 يوم هنصفي القرفة سواء عيدان أو مطحون، وناخد السبرتو المنقوع فقط ونحطّه على جذور الشعر وهي مغسولة ونسيبه لمدة 15: 20 دقيقة وبعدين نغسله مرة واحدة بعد كده، وممكن نعمل الماسك ده مرة واحدة في الأسبوع بجانب الماسكات التانية اللي في الحلقة دي أو الحلقات اللي فاتت.

زهرة الكاموميل لعلاج مشاكل الشعر
هنجيب لتر ونصف ميه أو 5 أكواب كبيرة ميه ونحط عليها 5 ملاعق كبيرة زهرة الكاموميل ونغليهم على النار فترة لحد ما الكمية تقل النصف، وبعد كده هنصفي الكاموميل وناخد المغلي نحطه في طبق غويط ونغسل شعرنا كويس وننقع شعرنا فيه بالكامل، وماننساش ناخد منه ونحطّ على الجذور والشعر من فوق لمدة نصف ساعة، الماسك ده هيعالج كل مشاكل الشعر من تقصف وإجهاد وآثار الصبغة والشعر الباهت.

المايونيز لتقصيف الشعر
هنجيب المايونيز ونحطّ منه على الشعر من أول الجذور لحد الاطراف زي الصبغة كده، ونسيبه على الشعر لمدة ساعة وبعدين نغسله مرة واحدة وهيجيب نتيجة هايلة للشعر المتقصف.

ماسكات البشرة والجسم
ماسك اللانولين للبشرة الجافة والتجاعيد
الماسك ده للبشرة شديدة الجفاف واللي فيها تجاعيد؛ لأن اللانولين من المواد القوية لتليين البشرة الجافة، وكمان عسل النحل زي ما كلنا عارفين مفيد لكل أنواع البشرة، كمان زيت الجوجوبا مفيد جدا للتجاعيد؛ لأنه بيحتوي على نسبة كولاجين عالية ودي مهمة للبشرة ولما بتفقدها مع السن بتظهر التجاعيد، يعني مهم أوي إن بعد سن 35 نبدأ نستخدم ماسكات وكريمات مرطبة جدا، وتكون بتحتوي على فيتامين E وعلى نسبة عالية من زيت الجوجوبا اللي بيحتوي الكولاجين، ودي من القواعد اللي بتخلي البشرة شباب لفترة أطول.

المكونات:
1/ 4 ملعقة صغيرة لانولين
ملعقة كبيرة زيت جوجوبا
ملعقة صغيرة عسل نحل

الطريقة:
هناخد اللانولين ونسيّحه كويس على النار وبعدين نحط عليه زيت الجوجوبا وعسل النحل، وممكن نحطّ شمع العسل لو فيه، ونقلبه كويس أوي بعيد عن الحرارة.

هنستخدم الماسك ده للإيدين والبشرة والجسم، بالنسبة للبشرة والجسم ممكن نحطه لمدة ساعة وبعدين نشطفه بالميه، أما للإيدين ممكن نسيبه على الإيد وننام بيه هتحسي بفرق كبير جدا بعد ما تصحي.

صابون الأناناس للجسم والايدين
المكونات:
قطعة أناناس صغيرة
صابونة جونسون مبشورة

الطريقة:
هنقطع الأناناس قطع صغيرة ونهرسها أو ممكن نضربها في الخلاط، وبعدين نحطها في حلة على النار ونحط عليها بشر الصابون ونقلبهم مع بعض كويس أوي لحد ما يدوبوا سوا، ممكن لو حابين نضيف ملعقة صغيرة عسل وممكن نكتفي بالأناناس والصابون فقط.

هنصبّ الخليط في قالب ونسيبها لمدة 15: 30 يوم علشان تتجمد، ونبدأ نستخدمها للإيدين والجسم وهتحسوا بنعومة ولمعان للجسم بعد استخدامها ونتيجة ملحوظة إن شاء الله.